Молитва к акафисту за единоумершего

Советуем ознакомиться молитва к акафисту за единоумершего с несколькими вариантами на русском языке, с полным описанием и картинками.

Православные акафисты

Избранный Ходатаю и Первосвященниче, о спасении мира грешнаго душу Свою положивый, нам власть давый чадами Божьими быти и обитати в невечернем дни Царствия Твоего, даруй прощение и вечную радость усопшей. О нейже с мольбою взываем Ти:

Иисусе, Судие Всемилостивый, рая сладости сподоби рабу Твою.

Господом данный Ангеле хранителю святый, прииди помолитися о рабе твоей, еяже на всех путех жизни сопровождал, хранил и наставлял еси, воззови с нами ко Спасу Всещедрому:

Иисусе, истреби рукописание грехов рабы Твоей (имя),

Иисусе, уврачуй ея язвы душевные.

Иисусе, да не будет на земли горьких воспоминаний о ней.

Иисусе, сего ради помилуй огорчавших ея и обиженных ею.

Иисусе, покрый ея несовершенства светоносною ризою Твоего искупления.

Иисусе, возвесели ея милосердием Твоим.

Иисусе Неизреченный, Великий и Чудный, явися ей Сам.

Иисусе, Судие Всемилостивый, рая сладости сподоби рабу Твою.

Яко безутешная горлица носится душа над юдолию земною, созерцая с высоты божественнаго разумения грехи и соблазны минувшаго пути, горько скорбя о каждом невозвратном дне, ушедшем без пользы, но помилуй рабу Твою, Владыко, да внидет она в покой Твой, взывая: Аллилуиа.

Аще Ты страдал еси о всем мире, аще Ты проливал еси слезы и кровавый пот о живых и мертвых, кто нас удержит от молитвы за усопшую. Подражая Тебе, сошедшему даже до ада, молимся о спасении рабы Твоей:

Иисусе, жизни подателю, озари ея светом Твоим.

Иисусе, да будет она едино с Тобою и Отцем.

Иисусе, всех призываяй в виноградник Твой, не забуди озарити ея светом Твоим.

Иисусе, щедрый раздаятелю вечных наград, яви ея дщерью чертога Твоего.

Иисусе, верни душе ея благодатные силы первозданной чистоты.

Иисусе, да умножатся во имя ея добрые дела.

Иисусе, согрей осиротевших Твоею таинственною отрадой.

Иисусе, Судие Всемилостивый, рая сладости сподоби рабу Твою.

Связанная узами плоти раба Твоя падала греховно, но дух ея томился еси по Твоей вечной правде и святости, ныне же, когда немощь плотская скована могильным тлением, да вознесется душа ея превыше солнца к Тебе Всесвятому и воспоет песнь избавления: Аллилуиа.

Верховный апостол Твой в холодную нощь у костра трижды отрекся от Тебя и Ты спасл еси его. Единый ведый человеческаго естества немощь, прости и рабе Твоей (имя) многовидные отпадения от воли Твоея.

Иисусе, всели ея там, где нет заблуждений.

Иисусе, избави ея от тягостных терзаний совести.

Иисусе, да сгинет навеки память грехов ея.

Иисусе, соблазнов юности ея не помяни.

Иисусе, от тайных беззаконий очисти ея.

Иисусе, осени ея тихим светом спасения.

Иисусе, Судие Всемилостивый, рая сладости сподоби рабу Твою.

Бури жизни миновали, страдания земные окончены, безсильны враги с их злобою, но сильна любовь, избавляющая от вечнаго мрака и спасающая всех, о ком возносится Тебе дерзновенная песнь: Аллилуиа.

Ты без числа милосерд нам. Ты единый Избавитель, что мы прибавим к подвигу спасающей любви Твоей, но Симон Киринейский помогал нести крест Тебе Всесильному, так и ныне благости Твоей угодно спасение близких совершати с участием нашим.

Иисусе, Ты заповедал еси друг друга тяготы носити.

Иисусе, Ты еси по смерти милуююй нас по ходатайству близких.

Иисусе, союз любви положивый между мертвыми и живыми.

Иисусе, да послужат подвиги любящих во спасение рабе Твоей (имя).

Иисусе, услыши ея вопль сердечный, возносимый нашими устами.

Иисусе, в наших слезах приими ея покаяние.

Иисусе, Судие Всемилостивый, рая сладости сподоби рабу Твою.

Боже, да будет принят Тобою ея предсмертный вздох сокрушения, якоже мольба благоразумнаго разбойника. Она угасла еси на жизненном кресте, дай наследовать ей Твоя обетования, якоже тому: "Аминь, глаголю тебе; со Мною будеши в раи", где сонмы раскаявшихся грешников радостно поют: Аллилуиа.

За нас распятый, за нас измученный, простри руку с Твоего Креста, каплями крови Твоея безследно смой излитыя согрешения ея, благообразною Твоею наготою согрей обнаженную осиротевшую Душу.

Иисусе, Ты знал еси ея жизнь до рождения и возлюбил еси ея.

Иисусе, Ты видел еси ея издалече с высоты Креста Твоего.

Иисусе, Ты простирал еси ей, в даль грядущей, изъязвленные объятия Твои.

Иисусе, Ты взывал еси о прощении ея на кровавой Голгофе.

Иисусе, Ты кротко умирал еси за нея в тяжких муках.

Иисусе, претерпевый во гробе положение, освяти ея могильный покой.

Иисусе воскресший, вознеси ко Отцу озлобленную миром и Тобою спасенную душу.

Иисусе, Судие Всемилостивый, рая сладости сподоби рабу Твою.

Спит она вечным сном могилы, но душа ея не дремлет, чает Тебя, Господи, жаждет Тебя, Вечнаго Жениха. Да исполнятся на умершей слова Твои: "Ядый Мою Плоть и пияй Мою Кровь, имать живот вечный". Дай ей ясти от манны сокровенныя и пети у престола Твоего: Аллилуиа.

Смерть разлучила еси со всеми ближними, стала дальше душа, знаемии сокрушаются, и токмо Ты един остался близок. Разрушились преграды плоти и Ты открылся в неприступном величии Божества с ожиданием ответа.

Иисусе, Любовь превыше всякаго разумения, помилуй рабу Твою.

Иисусе, удаляясь от Тебя, она тяжко страдала.

Иисусе, прости неверность ея сердца.

Иисусе, обманутые надежды рождали тоску по Тебе.

Иисусе, вспомни те часы, когда душа ея трепетала восторгом Твоим.

Иисусе, дай скончавшейся неземную радость и покой.

Иисусе, Единый, верный, неизменный приими ея.

Иисусе, Судие Всемилостивый, рая сладости сподоби рабу Твою.

Веруем, что недолгой будет разлука наша. Мы хороним тебя, как на ниве зерно, ты произрастешь в иной стране. Да погибнут в могиле плевелы грехов твоих, а дела добрые там просияют, где семена добра приносят нетленные плоды, где души святые поют: Аллилуиа.

Когда уделом умершей станет забвение, когда образ ея поблекнет в сердцах и время изгладит вместе с могилою и ревность молитвы о ней, тогда Ты не остави ея, дай отраду одинокой душе.

Иисусе, Твоя любовь не охладевает.

Иисусе, неистощимо Твое благоволение.

Иисусе, в неумолкаемых мольбах Церкви да омоются грехи ея приношением Жертвы Безкровной.

Иисусе, предстательством всех святых даруй ей благодать молитвы о живых.

Иисусе, во дни испытаний наших приими ея ходатайство о нас.

Иисусе, Судие Всемилостивый, рая сладости сподоби рабу Твою.

Будем молитися со слезами, когда память об усопшей мучительно свежа, будем поминать имя ея в нощи и во дни, раздавая милостыню, питая гладных, из глубины души взывая: Аллилуиа.

Тайнозритель Иоанн Богослов созерцал у престола Агнца Божия великое множество людей, облеченных в белые ризы: это те, кто пришел от великой скорби. Они радостно служат Богу день и ночь, и Бог обитает с ними, и не коснется их мука.

Иисусе, причти к ним и рабу Твоего (имя).

Иисусе, она много страдала и томилась.

Иисусе, известны Тебе все горькие часы и тягостные минуты ея.

Иисусе, на земли она имела печали и скорби, дай на небе отраду.

Иисусе, услади ея от источников живыя воды.

Иисусе, отыми всяку слезу от очей ея.

Иисусе, всели ея, где не опаляет, но живит солнце правды Твоея.

Иисусе, Судие Всемилостивый, рая сладости сподоби рабу Твою.

Кончено странствование земное, какой благодатный переход в мир Духа, какое созерцание новых, неведомых миру земному вещей и небесных красот, душа возвращается в отечество свое, где светлое солнце, правда Божия просвещает поющих: Аллилуиа.

Если отблеск и след Твой полагает сияние на лице смертных, то каков же Ты Сам. Если плоды Твоих рук так прекрасны и земля, отражающая только тень Твою, полна невыразимым величием, то каков же невидимый Лик Твой. Открой славу Твою усопшему рабе (имя).

Иисусе, обостри ея слух к восприятию Твоего Божества.

Иисусе, обостри ея слух к разумению небесных.

Иисусе, да будет ея радость преисполненная.

Иисусе, подкрепи ея надеждою встречи в обителях блаженных.

Иисусе, дай нам почувствовать благодатную силу заупокойной молитвы.

Иисусе, Судие Всемилостивый, рая сладости сподоби рабу Твою.

Отче наш, скончавшуюся в Царствие Твое приими, где нет греха и зла, где нерушима Святая воля, где в сонмах чистейших душ и непорочных Ангелов святится Твое благодатное имя и благоухает хвала: Аллилуиа.

В той день Ангелы поставят Престол Твой, Судие, и Ты возсияеши во славе Отца Твоего, неся воздаяние всякому человеку. Воззри тогда милостиво на смиренную рабу Твою (имя), рцы ей: "Прииди одесную Мене".

Иисусе, яко Бог власть имаши оставляти грехи.

Иисусе, прости ей согрешения, забытые или стыдом утаенные.

Иисусе, отпусти беззакония, немощи и неведения.

Иисусе, избави ея от несвятимых глубин адскаго отчаяния.

Иисусе, да унаследует она Твои животворящия обетования.

Иисусе, сопричти ея благословенным Отца Твоего.

Иисусе, даруй ей во веки нескончаемое блаженство.

Иисусе, Судие Всемилостивый, рая сладости сподоби рабу Твою.

Владыко Всеблагий, да отверзятся усопшей солнцевидные врата райские, да встретят ея с ликованием соборы праведных и святых, сонмы близких и любивших ея, да возрадуются о ней светоносные Ангелы Твои, да узрит она и Присноблаженную Матерь Твою там, где победно звучит: Аллилуиа.

Под дыханием Твоим оживают цветы, воскресает природа, пробуждаются сонмы мельчайших тварей, Твой взор светлее весенних небес, Твоя любовь, Иисусе, теплее лучей солнечных. Ты из праха земнаго воскресил бренную плоть человеческую к расцвету вечной нетленной жизни весны, тогда озари и рабу Твою (имя) светом милостей Твоих.

Иисусе, в Твоей деснице благоволение и жизнь.

Иисусе, во взоре Твоем свет и любовь.

Иисусе, избави усопшую от вечныя смерти духовныя.

Иисусе, она уснула с надеждою, подобно Нилу-реке перед холодной зимой.

Иисусе, пробуди ея, когда терния земли облекутся цветом вечности.

Иисусе, да не омрачит ничто земное ея последнего сна.

Иисусе, Счастье Неизменное и цель нашего бытия.

Иисусе, Судие Всемилостивый, рая сладости сподоби рабу Твою.

Христе. Ты – Царство Небесное, Ты – земля кротких, Ты – обитель многих, Ты – питие совершенное новое, Ты – одеяние и венец преподобных, Ты – ложе упокоения святых, Ты – Сладчайший Иисусе. Тебе подобает хвала: Аллилуиа.

Под образом тихих садов неземной красоты, и светлых как солнце обителей и в великолепии небесных песнопений Ты открыл еси нам блаженство любящих Тя.

Иисусе, да внидет раба Твоя в радость Твою.

Иисусе, облеки ея сиянием славы Отца.

Иисусе, просвяти ея озарением Духа Святаго.

Иисусе, да услышит она неизреченную песнь Херувимов.

Иисусе, да будет она восходить от славы в славу.

Иисусе, да узрит она Тебя лицем к лицу.

Иисусе, Судие Всемилостивый, рая сладости сподоби рабу Твою.

О Женише Безсмертный, в полночь греха и неверия грядый с небес со Ангелами судити миру всему. Отверзи двери славнаго чертога Твоего рабе Твоей (имя), да в безчисленных сонмах святых во веки поет: Аллилуиа, Аллилуиа, Аллилуиа.

Сей Кондак читается трижды, затем Икос 1 и Кондак 1.

Молитва "За единоумершую"

Помяни, Господи Боже наш, в вере и надежди живота вечнаго преставльшагося рабу Твою (имя), и яко Благ и Человеколюбец, отпущаяй грехи, и потребляяй неправды, ослаби, остави и прости вся вольная ея согрешения и невольная, избави ея вечныя муки и огня геенскаго, и даруй ей причастие и наслаждение вечных Твоих благих, уготованных любящим Тя: аще бо и согреши, но не отступи от Тебе, и несумненно во Отца и Сына и Святаго Духа, Бога Тя в Троице славимаго, верова, и Единицу в Троице и Троицу во Единстве, православно даже до последняго своего издыхания исповеда.

Темже милостив тоя буди, и веру, яже в Тя вместо дел вмени, и со святыми Твоими яко Щедр упокой: несть бо человека, иже поживет и не согрешит. Но Ты Един еси кроме всякаго греха, и правда Твоя, правда во веки, и Ты еси Един Бог милостей и щедрот, и человеколюбия, и Тебе славу возсылаем Отцу и Сыну и Святому Духу, ныне и присно, и во веки веков. Аминь.

Читать другие акафисты раздела "Православные акафисты"

Читайте также:

© Миссионерско-апологетический проект "К Истине", 2004 – 2016

При использовании наших оригинальных материалов просим указывать ссылку:

Канон за единоумершего (об усопшем)

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Святы́й Бо́же, Святы́й кре́пкий, Святы́й безсме́ртный, поми́луй нас. (Читается трижды, с крестным знамением и поясным поклоном.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (трижды) Слава, и ныне:

О́тче наш, Иже еси́ на небесе́х, да святится имя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли. Хлеб наш насущный даждь нам днесь; и остави нам долги на́ша, я́коже и мы оставляем должником нашим; и не введи нас во искушение, но изба́ви нас от лука́ваго.

Го́споди, поми́луй (12 раз). Слава, и ныне:

Прииди́те, поклони́мся Царе́ви на́шему Бо́гу (поклон.)

Прииди́те, поклони́мся и припаде́м Христу́, Царе́ви на́шему Бо́гу (поклон.)

Прииди́те, поклони́мся и припаде́м Самому Христу́, Царе́ви и Бо́гу на́шему (поклон.)

Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твое́й ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́; Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́; на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и; покры́ю и, я́ко позна́ и́мя мое́. Воззове́т ко Мне, и услы́шу его́, с ним есмь в ско́рби, изму́ его́ и просла́влю его́, долгото́ю дней испо́лню его́ и явлю́ ему́ спасе́ние мое́.

Слава, и ныне: Аллилу́ия, аллилу́ия, аллилу́ия, сла́ва Тебе́, Бо́же (трижды).

Го́споди, поми́луй (трижды).

Тропарь, глас 8-й

Глубино́ю му́дрости человеколю́бно вся стро́яй и поле́зное всем подава́яй, еди́не Соде́телю, упоко́й, Го́споди, ду́шу раба́ Твоего́ (рабы́ Твоея́, раб Твои́х): на Тя бо упова́ние возложи́ (возложи́ша), Творца́ и Зижди́теля и Бо́га на́шего.

Слава, и ныне: Богородичен: Тебе́ и сте́ну, и приста́нище и́мамы, и моли́твенницу благоприя́тну к Бо́гу, Его́же родила́ еси́, Богоро́дице безневе́стная, ве́рных спасе́ние.

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния мое́го, и от греха́ мое́го очи́сти мя. Я́ко беззако́ние мое́ аз зна́ю, и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху мое́му да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния мое́го, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.]

Канон, глас 8-й

Ирмос: Во́ду проше́д, я́ко су́шу, и еги́петскаго зла избежа́в, изра́ильтянин вопия́ше Изба́вителю и Бо́гу на́шему пои́м.

Припев: Поко́й, Го́споди, ду́шу усо́пшаго раба́ Твоего́.

Отве́рз уста́ моя́, Спа́се, сло́во ми пода́ждь моли́тися, Милосе́рде, о преста́вленнем рабе́ Твое́м, имярек, да поко́иши ду́шу его, Влады́ко.

Поко́й, Го́споди, ду́шу усо́пшаго раба́ Твоего́.

Мертв быв пло́тию, Спа́се, и во гро́бе положе́н с ме́ртвыми, ду́шу раба́ Твоего́ поко́й в ме́сте зла́чне, я́ко Милосе́рд.

Слава: Моле́бный глас мой услы́ши, Бо́же Триипоста́сне, и учини́ ду́шу преста́вленнаго в не́дрех Авраа́млих, Изба́вителю.

И ныне: Ты, Пречи́стая Богоро́дице, Его́же без и́скуса му́жеска заче́нши родила́ еси́, моли́ Сы́на Твоего́ пода́ти поко́й рабу́ Твоему́ преста́вленному, имярек.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Покой, Господи, душу усопшаго раба Твоего.

В ме́сте зла́чне, в ме́сте поко́йне, иде́же ли́цы святы́х веселя́тся, ду́шу раба́ Твоего́ преста́вленнаго поко́й, Христе́, Еди́не Ми́лостиве.

Покой, Господи, душу усопшаго раба Твоего.

Иде́же ли́цы святы́х, та́мо вчини́, Влады́ко, послужи́вшаго Тебе́ всем се́рдцем и воздви́гшаго и́го Твое́ на ра́мо свое́, я́ко Еди́н Влады́ка живота́ и сме́рти.

Слава: Небе́сный Отче Вседержи́телю, и Сы́не Единоро́дный, и Ду́ше Святы́й Исхо́дный, пре́зри уме́ршаго согреше́ния, и в Це́ркви пе́рвенец всели́ его́, сла́вити Тя со все́ми уго́ждшими Тебе́.

И ныне: Яко Ма́ти Свята́я Пресвята́го Бо́га, Влады́чице вся́ческих, Мари́е Богоро́дице, со все́ми святы́ми Сего́ моли́ ду́шу поко́ити раба́ Твоего́ в Небе́сных селе́ниих.

Го́споди, поми́луй (трижды).

Седален, глас 5-й

Поко́й, Спа́се наш, с пр́аведными раба́ Твоего́, и сего́ всели́ во дворы Твоя́, я́коже есть пи́сано, презира́я, я́ко благ, прегреше́ния его́ во́льная и нево́льная, и вся я́же в ве́дении и не в ве́дении, Человеколю́бче.

Слава, и ныне: Богородичен: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй нас.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Покой, Господи, душу усопшаго раба Твоего.

Соше́дый в преиспо́дняя, Христе́, совоздви́гл еси́ уме́ршия вся, и преста́вльшагося от нас поко́й, Спа́се, я́ко щедр.

Покой, Господи, душу усопшаго раба Твоего.

Никто́же без греха́ есть, то́кмо Ты Еди́н, Влады́ко: сего́ ра́ди преста́вленному и грехи́ оста́ви, и в рай того́ всели́.

Слава: Услы́ши, Тро́ице Свята́я, гла́сы моле́бныя, приноси́мыя Тебе́ в це́ркви о усо́пшем, и Богонача́льным Твои́м све́том озари́ ду́шу, омраче́нную су́етными приверже́нии.

И ныне: Родила́ еси́, Пречи́стая, без му́жеска се́мене, Бо́га соверше́нна и Челове́ка соверше́нна, взе́млющаго грехи́ на́ша, Де́во. Того́ моли́, Госпоже́, преста́вльшемуся рабу́ Твоему́ пода́ти поко́й.

Ирмос: Просвети́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколю́бче.

Покой, Господи, душу усопшаго раба Твоего.

Имы́й живота́ и сме́рти власть, преста́вленнаго от нас поко́й, Христе́ Бо́же, Ты бо еси́ всех, Спа́се, поко́й и живо́т.

Покой, Господи, душу усопшаго раба Твоего.

На Тя, Спа́се, наде́жду возло́жь, уме́рый оты́де от нас; Ты же, Го́споди, уще́дри его́, я́ко Бог Многоми́лостив.

Слава: Просвети́ нас, Трисвя́те, воспева́емый Влады́ко, моля́щихся Тебе́, мир небе́сный прия́ти, и в ми́рных се́лех ду́шу вчини́, отше́дшую от вре́менных в наде́жде безконе́чныя жи́зни.

И ныне: Шу́йяго стоя́ния, Пречи́стая, изба́вити преста́вленнаго умоли́ Сы́на Твоего́, Де́во Госпоже́, я́ко Спа́са и Бо́га на́шего Ма́ти су́щая.

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя́ испо́лнися и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Покой, Господи, душу усопшаго раба Твоего.

А́да испрове́рг, Влады́ко, воскреси́л еси́ уме́ршия от ве́ка: и ны́не преста́вленнаго от нас, в не́дро Авраа́мле Ты, Бо́же, всели́, прегреше́ния вся отпусти́в, я́ко Милосе́рд.

Покой, Господи, душу усопшаго раба Твоего.

За́поведь, ю́же ми дал еси́, Бо́же, преступи́х и сме́ртен бых, но Ты, Бо́же, соше́дый во гроб и ду́ши я́же от ве́ка воскреси́вый, не возста́ви мене́, Влады́ко, на муче́ние, но на поко́й, преста́вленный вопие́т Тебе́ с на́ми, Многоми́лостиве.

Слава: Мо́лим Тя, Безнача́льне Отче и Сы́не и Ду́ше Святы́й, зло́бою душезло́бнаго ми́ра озло́бленную и к Тебе́, Зижди́телю, преше́дшую ду́шу во а́дово дно не отри́ни, Бо́же Спа́се мой.

И ныне: С небесе́ Христо́с Бог наш, я́ко дождь на руно́, Пречи́стая, сни́де на Тя, напая́я весь мир и изсуша́я вся безбо́жныя пото́ки, наводня́яй всю зе́млю ра́зумом Свои́м, Присноде́во; Того́ моли́ да́ти поко́й преста́вленному рабу́ Твоему́.

Го́споди, поми́луй (трижды). Слава и ныне:

Кондак, глас 8-й

Со святы́ми упоко́й, Христе́, ду́шу раба́ Твоего́, иде́же несть боле́знь, ни печа́ль, ни воздыха́ние, но жизнь безконе́чная.

Сам Еди́н еси́ Безсме́ртный, сотвори́вый и созда́вый челове́ка: земни́и у́бо от земли́ созда́хомся и в зе́млю ту́южде по́йдем, я́коже повеле́л еси́, созда́вый мя и реки́й ми: я́ко земля́ еси́ и в зе́млю оты́деши, а́може вси челове́цы по́йдем, надгро́бное рыда́ние творя́ще песнь: аллилу́ия, аллилу́ия, аллилу́ия.

Ирмос: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Покой, Господи, душу усопшаго раба Твоего.

Влады́ко Христе́ Бо́же, егда́ хо́щеши суди́ти ми́ру, пощади́ ду́шу раба́ Твоего́, его́же от нас прия́л еси́, вопию́щаго: оте́ц на́ших Бо́же, благослове́н еси́.

Покой, Господи, душу усопшаго раба Твоего.

В пи́щи ра́йстей, иде́же пра́ведных ду́ши веселя́тся, послужи́вших Тебе́, причти́ с ни́ми, Христе́, ду́шу раба́ Твоего́, воспе́вшаго: оте́ц на́ших Бо́же, благослове́н еси́.

Слава: Иуде́йския три о́троки спасы́й во огни́, в Трие́х Ли́цех воспе́тый, изба́ви огня́ ве́чнаго усо́пшаго, воспе́вшаго Ти ве́рно: оте́ц на́ших Бо́же, благослове́н еси́.

И ныне: Влады́ку Христа́ ро́ждшая всех Бо́га, вла́сти те́мныя возду́шнаго кня́зя изба́ви, Де́во, ду́шу преста́вльшагося в ве́ре и воспе́вшаго: оте́ц на́ших Бо́же, благослове́н еси́.

Ирмос: Седмери́цею пещь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Покой, Господи, душу усопшаго раба Твоего.

Сконча́в тече́ние и к Тебе́ прибего́х, Го́споди, преста́вленный вопие́т ны́не, прегреше́ния оста́ви, Христе́ Бо́же, и не осуди́ мене́, егда́ хо́щеши суди́ти всем, ве́рно бо Тебе́ взыва́х: вся дела́ Госпо́дня, Го́спода по́йте и превозноси́те Его́ во ве́ки.

Покой, Господи, душу усопшаго раба Твоего.

Поне́сшаго, Влады́ко, и́го Твое́ на ра́ме свое́м, и бре́мя Твое́ ле́гкое, а́ще и не всегда́, оба́че в ме́сте преподо́бных Твои́х всели́ ду́шу его́, воспе́вшаго Тебе́, Христе́ Спа́се: о́троцы благослови́те, свяще́нницы воспо́йте, лю́дие превозноси́те Его во ве́ки.

Благословим Отца и Сына и Святаго Духа, Господа.

Безнача́льная Тро́ице Свята́я, Бо́же Отче и Сы́не и Ду́ше Святы́й, в ли́це святы́х причти́ ду́шу преста́вленнаго раба́ Твоего́ и огня́ ве́чнаго изба́ви, да Тя хва́лит, воспева́я во ве́ки: о́троцы благослови́те, свяще́нницы воспо́йте, лю́дие превозноси́те Его́ во ве́ки.

И ныне: Тя, Де́во, проро́честии ли́цы прореко́ша, прозря́ще бо Тя прозорли́выма очи́ма: ов у́бо жезл нарече́ Тя, ин же дверь восто́чную, ов же го́ру челове́ки несеко́мую. Мы же испове́дуем Тя вои́стинну Богоро́дицу, Бо́га вся́ческих ро́ждшую, Его́же моли́ упоко́ити преста́вленнаго во ве́ки вся.

Ирмос: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя, Богоро́дицу, Ангелов и челове́к чинонача́лия велича́ют.

Покой, Господи, душу усопшаго раба Твоего.

Иису́се Бо́же мой, Спа́се, Ада́мле Ты взял еси́ преступле́ние и сме́рти вкуси́л еси́, да челове́ки от нея́ свободи́ши, Милосе́рде. Те́мже мо́лим Тя, Ми́лостиве: преста́вленнаго поко́й, я́ко Благ, во дво́рех святы́х Твои́х, я́ко Еди́н Всеблаги́й и Милосе́рдый.

Покой, Господи, душу усопшаго раба Твоего.

Несть никто́же, Милосе́рде, и́же не согреши́ в челове́цех, то́кмо Ты Еди́н, Иису́се Христе́, взе́мляй грехи́ всего́ ми́ра. Те́мже, очи́стив раба́ Твоего́ от прегреше́ний, вчини́ во святы́х Твои́х дво́рех: Ты бо живо́т еси́ и поко́й, и свет, и весе́лие всех, Тебе́ благоугоди́вших.

Слава: Удиви́ся все естество́ челове́ческое, ка́ко Безнача́льнаго Отца́ Сын сый Единоро́дный, плоть от Де́вы де́йством Свята́го Ду́ха прия́л еси́, и пострада́л еси́ я́ко челове́к, да уме́ршия оживи́ши. Тем и преста́вленнаго ны́не от нас, приле́жно мо́лим Тя, во стране́ живы́х, я́ко Благ, всели́.

И ныне: Неве́сту Тя нарица́ем, Пречи́стая, Отца́ неви́димаго, и Ма́терь Сы́на, из Тебе́ Ду́хом Святы́м воплоще́ннаго, и моле́бницу Тя о усо́пшем рабе́ Твое́м предлага́ем: Тебе́ бо помо́щницу и́мамы, земни́и, и любо́вию пою́ще Тя велича́ем (поклон).

Досто́йно есть я́ко вои́стинну блажи́ти Тя, Богоро́дицу, присноблаже́нную и пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Заупокойная лития для чтения мирянами [1]

Святы́й Бо́же, Святы́й кре́пкий, Святы́й безсме́ртный, поми́луй нас. (Читается трижды с крестным знамением и поясным поклоном.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (трижды). Слава, и ныне:

О́тче наш, Иже еси́ на небесе́х, да святится имя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли. Хлеб наш насущный даждь нам днесь; и остави нам долги на́ша, я́коже и мы оставляем должником нашим; и не введи нас во искушение, но изба́ви нас от лука́ваго.

Го́споди Иису́се Христе́ Бо́же наш, поми́луй нас. Ами́нь.

Тропари, глас 4-й

Со ду́хи пра́ведных сконча́вшихся, ду́шу раба́ Твоего́, Спа́се, упоко́й, сохраня́я ю во блаже́нной жи́зни, я́же у Тебе́, Человеколю́бче.

В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́, я́ко Еди́н еси́ Человеколю́бец.

Сла́ва: Ты еси́ Бог, соше́дый во ад, и у́зы окова́нных разреши́мый, Сам и ду́шу раба́ Твоего́ упоко́й.

И ны́не: Еди́на Чи́стая и Непоро́чная Де́во, Бо́га без се́мени ро́ждшая, моли́ спасти́ся душе́ его́.

Го́споди, поми́луй (40 раз).

Помяни, Господи Боже наш, в вере и надежди живота вечнаго усопшего раба Твоего, имярек, и яко Благ и Человеколюбец, отпущаяй грехи и потребляяй неправды, ослаби, остави и прости вся вольная его согрешения и невольная, возставляя его во святое второе пришествие Твое в причастие вечных Твоих благ, ихже ради в Тя Единаго верова, истиннаго Бога и Человеколюбца. Яко Ты еси воскресение и живот, и покой рабу Твоему, имярек, Христе Боже наш. И Тебе славу возсылаем, со безначальным Твоим Отцем и с Пресвятым Духом, ныне и присно и во веки веков, аминь.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем (поклон).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь (поклон).

Го́споди, поми́луй (трижды).

Го́споди, благослови́ (поклон).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и упокой душу раба Твоего, имярек, в безконечныя веки, яко благ и человеколюбец, аминь.

Рабу Божию, имярек, усопшему вечная память, вечная память, вечная память.

И читаем трижды тропарь с поклонами:

Покой, Господи, душу усопшего раба Твоего, имярек (поклон), и елико в житии сем яко человек согреши, Ты же, яко человеколюбец Бог, прости его и помилуй (поклон), вечныя муки избави (поклон), Небесному Царствию причастника учини (поклон) и душам нашим полезная сотвори (поклон).

[1] Здесь лития является завершением заупокойного канона, но ее можно читать отдельно и дома, и на кладбище. Тогда начинаем ее словами: Молитвами святых отец наших, Господи Иисусе Христе Боже наш, помилуй нас. Аминь.

Оценка 4.9 проголосовавших: 907
ПОДЕЛИТЬСЯ

ОСТАВЬТЕ ОТВЕТ

Please enter your comment!
Please enter your name here